أول كلامي سلام لأهل بيتنا الكرام
كلامي معاكم الليلادي غير أي كلام
كلامي هيكون عن بلد الكل في حبها أتجلد
دا حبها فينا أتولد قبل الزمان بزمان
كلامي عن بلدي مش زي أي كلام
كلامي عنها غرام في غرام
كلام الحبيب لحبيبه لما ف وشه يقوله عيبه
كلامي يمكن فيه قساوة بس دا من كتر الغلاوة
ليه يا بلدي كل دا يجري وليه ياشعب تزيد قساوة
هي الناس أتبدلت ؟؟ .. ولا دا من الغباوة
حرق وضرب وسرقة ونهب وفوضي عمت ف البلد
يامصر قالوا فيك العجب علي كل شكل ولون
فيك الحرامي بقي بيه والشريف مسجون
وفيك الخسيس بقي ولي والأصيل مطحون
والكل نازل ينهش ف لحمك والسكين مسنون
ما حد سامع أنينك غير اللي بحبك معجون
ودول كتير وياما بس صوتهم في الحلوق مسجون
لاهمه اللي قدروا يسيبوكي ولا حتي عرفوا يحموكي
من ناسك التانيين اللي معاهم السكاكين
تقطيع وف جسمك الجميل نازلين
وشعبك المسكين بيتفرج
لا هو عارف يسكت
ولاهو قادر يتحرك
يابلدي قومي وأنهضي
وعن ضهرك أنفضي .. تراب السنين
قومي يابلدي وكبري مع الآذان ورددي
الله أكبر عالعدا الله أكبر عالمفتري
شبابك يامصر ثار وهو واخد قرار
يشيل عنك ظلم السنين
من اللي علي نفسك كاتمين
ولا بيك حاسين
الكيل طفح يابلدي والناس مبقتش متحمله
لا تقولي حسني ولا جمال ولا عز دول ناس متنبله
وسرور يغور ويا سيد قراره بكل مافيه من نسانيس
ولا إخوان ولا نور ولا برادعي دول كلهم مناحيس
كان فين البرادعي لما الشعب ثار
ولا نور اللي قاعد بينفخ في النار
وإلاخوان عاوزين حريقة يولعوا ف الدار
لجل ما يقولوا شهداء وأبرار
خلاص بقي ياعالم كفاياكم إستهتار
الناس عارفه مين بيحبها ومين بيلعب بالنار
مش عاوزين صور يحركوها من خلف الستار
عاوزين ولاد البلد الوطنيين الأحرار
اللي في حبها يضحوا بعمرهم مش ينهبوا الآثار
كفاية بقي حرام عليكم دي البلد بتئن
من لهيب النار
نار هتاكل في الكل مش هتختار
فوق ياشعب وأعرف مين عدوك ومين حبيبك
متخليش الغضب يبقي هو عيبك
دا الكل قاعد لمصر ونفسهم تتهد بيك
أثبتلها حبك بلاش تولعها بأيديك
حافظ عليها وحطها في عينيك
وتعالي بينا نغني
يامصر ياحته مني
شايلك جوه نني
وبعمري أفديكي
